Ka përfunduar qetë para pak çastesh protesta në Kumanovë, ku disa mijëra qytetarë nga ky qytet, por edhe nga vende tjera të Maqedonisë kërkuan drejtësi për vrasjen e fëmijës 4-vjeçar Almir Aliu nga një bashkëqytetar maqedonas. Protestuesit porositën se “nëse nuk funksionon sistemi, qytetarët mund ta marrin në duart e veta drejtësinë”.
Në fund të protestës, që u përmbyll para gjykatës në Kumanovë, u lexua edhe mesazhi i organizatorëve.
“Fajtori duhet të dënohet në përputhje me Kushtetutën dhe me kodin penal të Maqedonisë.
Fëmijët janë ardhmëria e çdo shoqërie dhe kur cenohet jeta e tyre cenohet ardhmëria e vendit. Kur krimi nuk merr dënimin e vet, shpirti shqetësohet, urrejtja shtohet dhe qytetarët e marrin drejtësinë në duart e veta. Shpresojmë se institucionet e drejtësisë do të tregohen konstruktivë dhe të japin dënimin maksimal”, u tha mes tjerash në mesazhin e organizatorëve të protestës.
Organizatorët apeluan për shpërndarje të qetë të protestuesve, duke kërkuar që të mos bien në provokime eventuale të policisë.
