Ditë më parë, drejtori i Drejtorisë së Urbanizmit dhe Mjedisit, Lulzim Aliu nënshkroi dokumentin e parë të legalizimit të një objekti në territorin e Ferizajt. Ky proces i stërzgjatur ndër vite, tashmë është zhbllokuar dhe komunat janë të gatshme të zbatojnë gjithë rregullativën ligjore në fuqi për këtë fushë,e ndër të parat është edhe Komuna e Ferizajt.
Me një (1) euro për metër katror në kategorinë e parë të objekteve (shtëpi banimi – banim individual) dhe dy euro (2) për metër katror në kategorinë e dytë të objekteve (objekte të banimit kolektiv), ferizajasit kanë mundësinë që të aplikojnë për legalizimin e objekteve të tyre.
Sipas rregullativës ligjore në fuqi, aplikues në këtë proces mund të jenë vetëm pronarët që objektin e tyre e kanë të ndërtuar para datës 5 shtator 2018, natyrisht duke i përmbushur edhe kushtet e kriteret tjera, informacionet shtesë për të cilat, zyrtarët komunal në Drejtorinë e Urbanizmit dhe Mjedisit, janë të gatshëm t’i ofrojnë çdo ditë pune për të gjithë të interesuarit.
Komuna e Ferizajt, përkatësisht Drejtoria e Urbanizmit dhe Mjedisit fton gjithë qytetarët ferizajas që kanë objektet e tyre pa leje dhe që përmbushin kushtet e kriteret e lartcekura të aplikojnë në këtë proces të zhbllokuar së fundmi.
