Kryetari i degës së AAK-së në Ferizaj, Xhavit Zariqi, duke komentuar rezultatin e zgjedhjeve në Ferizaj dhe në gjithë Kosovën, tha se në uljen e votave të AAK-së ndikoi koalicioni parazgjedhor që ky subjekt lidhi me PDK-në.
Rezultatin zgjedhor Zariqi e quajti befasues, duke konsideruar se qytetarët i ndëshkuan ata që nuk kanë qeverisur mirë me vendin gjithë këto vite.
“Edhe Aleanca për Ardhmërinë e Kosovës e pagoi atë që ishte në koalicion me Partinë Demokratike, kurse Vetëvendosje mori një numër jashtëzakonisht të madh të votave, lirisht mund të themi të papritur, jo sepse është elektorati i Vetëvendosjes, por se votoi kundër të tjerëve edhe e favorizoi Vetëvendosjen, megjithatë rezultati është ky që është dhe është jashtëzakonisht i pranueshëm por që në këto zgjedhje nuk doli asnjë nga koalicioni ose nga partitë pjesëmarrëse në zgjedhje, fitues i zgjedhjeve i cili do të ketë të mundur ta krijojë qeverinë. Ishte një votë kundër atyre që kanë qeverisë sepse në këto zgjedhje pati rënie të votës nga të dy subjektet më të mëdha që ishin deri më tani në Republikën e Kosovës, pati rënie të votës edhe nga Partia Demokratike e Kosovës, edhe nga Lidhja Demokratike e Kosovës dhe në një formë e paguajtën atë që nuk qeverisën mirë për disa vite’’, u shpreh Zariqi.
Përkundër kësaj, Zariqi thotë se e mira që i solli koalicioni me PDK-në, partisë së tij, ishte kandidimi i liderit të AAK-së, Ramush Haradinaj, për kryeministër të vendit.
‘’AAK nuk ka pësuar fare sepse AAK-ja si parti ka rritje të votës d.m.th në çdo komunë, edhe në Ferizaj ka rritje të votës edhe atë jashtëzakonisht mirë, por që nuk ka votë të mjaftueshme për aq sa është punuar dhe propaganduar edhe për aq sa është dashtë të ketë, por sigurisht unë e thash që besoj se një numër i qytetarëve përkundër që ishin përcaktuar për të votuar për Aleancën, ka të tillë që janë edhe anëtarë të Aleancës dhe pjesëtarë edhe në struktura por kanë qenë të pakënaqur me koalicionin që është arritur me PDK-në edhe kjo ka qenë ndoshta ulja e përqindjes ose mosarritja e asaj që është synuar edhe normal gjithmonë ka individë brenda atyre stukturave që mund të jenë të pakënaqur dhe veprojnë ndryshe edhe në këtë rast ka pasur edhe e kanë shprehur edhe kanë treguar edhe normal kanë vepruar, ka pasur edhe qytetarë që kanë votuar për Vetëvendosjen pa e ditur pse votojnë por veç se të votojnë kundër atyre që kanë qenë në qeveri’’, theksoi Zariqi.
Në zgjedhjet e 11 qershorit në komunën e Ferizajt Lëvizja Vetëvendosje doli e para me 34.86%, pasuar nga koalicioni PDK-AAK-NISMA me 30.49% dhe koalicioni LDK-AKR-Alternativa me 29.85%. / TELEVIZIONI TEMA /