Lehtësimi i punës dhe veprimtarisë së bujqve dhe fermerëve ferizajas, përmes subvencionimit, mbështetjes me pajisje pune e investime kapitale është fokus i Drejtorisë së Bujqësisë dhe Pylltarisë.
Pasditen e sotme, Nënkryetari i Komunës, Lulzim Aliu, bashkë me drejtorin e Bujqësisë dhe Pylltarisë, Burim Bajrami dolën në terren, për të parë nga afër punët që po kryhen në disa terrene, në projektin për rregullimin e rrugëve të arave.
Për këtë projekt, drejtori Bajrami njoftoi se është vazhdimësi nga mandati i kaluar dhe si i tillë ofron përparësi të shumta, duke lehtësuar veprimtarinë e bujqve dhe fermerëve ferizajas. Ai tutje shtoi se janë dhjetëra hapësira ku po shtrihet dhe planifikon të shtrihet ky projekt për të përmbushur synimin e lartcekur në ndihmë të veprimtarisë së fermerëve dhe bujqve ferizajas.