Pasditen e sotme, vijoi dita e katërt e diskutimeve publike me qytetarët, për hartimin e projekt buxhetit 2022-2024, diskutime këto të ndara në dy termine kohore, njëra në shkollën “Bilall Shala” me banorët e fshatrave Llojza, Lloshkobare, Kosinë, Koshare, Dremjak, Muhoc, Saraishtë, Slivovë si dhe në shkollën “Liman Rekaj” ku u diskutuan me banorët e fshatrave Cërrnillë, Prelez i Muhaxherëve, Prelez i Jerlive, Surqinë, Mirash, Tërrn, Luboc, Bablak, Talinoc i Muhaxherëve, Talinoc i Jerlive, Softaj, Sazli, Pojatë, Rahovicë, Papaz.
Në prezantimin e mundësive buxhetore për përfshirjen e projektpropozimeve të reja nga banorët e fshatrave të lartcekura, Kryetari i Komunës, Agim Aliu, njoftoi se buxheti i investimeve kapitale për vitin pasrendës është 10,7 milionë euro, fond ky që pas konsultimeve me qytetarët si ky i sotmi, do të krijoj mundësinë për përfshirjen e projekteve të reja në këtë skemë buxhetore.
Banorët e fshatrave të lartcekura, u shprehën të kënaqur me investimet komunale të kryera në infrastrukturën rrugore, që kanë lehtësuar jetën e banorëve. Gjithashtu, banorët e fshatrave dhe udhëheqja e fshatrave të lartcekura parashtruar edhe projekte të reja si finalizimi me asfalt i rrugicave të mbetura në disa fshatra, ndërtimi i kopshteve për fëmijë, qendra shëndetësore, rregullimi i hapësirave të gjelbërta publike, fusha sportive, shtrirja e rrjetit të ndriçimit publik në disa lagje të mbetura të fshatrave, rregullimi i Parkut, hipodromit, monumentit për fëmijë, muzeut të tankut siç ishin ato të prezantuara nga përfaqësues të Prelezit të Muhaxherëve, e të tjera investime që kërkuan banorët të realizohen gjatë harkut kohor 2022-2024.
Për problematikat që u ngritën nga banorët, drejtorët e drejtorive komunale dhanë përgjigje.Ky është edhe diskutimi i fundit publik për hartimin e projektbuxhetit 2022-2024, ku deri më tani janë kryer 7 diskutime publike me banorët e përfaqësuesit duke përfshirë gjithë fshatrat e Ferizajt dhe zonën urbane.