Bëhet fjalë për franko-kanadezin Alexandre Bissonnette, 27 vjeç. “Nuk ka asgjë tjetër që të sugjerojë për të dyshuar të tjerë prapa veprimit kriminal”, ka deklaruar zëdhënësja e policisë, Christine Coulumbe.
I ndaluari tjetër, Mohamed el Khadir, një 30-vjeçar me origjinë marokene, konsiderohet dëshmitar i ngjarjes. Zëdhënësja ka saktësuar se, asnjëri prej tyre nuk ishte person i njohur për hetuesit.
Dy të rinjtë u ndaluan pak minuta pas masakrës. Njëri prej tyre ndodhej ende në vendin e ngjarjes, ndërsa tjetri në 20 kilometra distancë.
Sipas mediave kanadeze, i dyshuari Bissonette jeton në Kap Ruzh dhe studion antropologji dhe shkenca politike pranë universitetit Laval, më antiku në gjuhën frënge në Amerikën e veriut, me seli pranë një xhamie.
Përmes rrjetit social Twitter, analistja Rita Katz, drejtoreshë e SITE, faqe e specializuar në aktivitetet e xhuhadistëve, ka bërë me dije se në profilin e tij në Facebook, 27-vjeçari, i identifikuar thjesht si Alex B, shprehte simpati për Trump, Marine Le Pen dhe forcat e mbrojtjes izraelite.
Megjithatë, ka shtuar analistja, gjasat që i riu të ketë pasur lidhje me xhihadin janë inekzistente.