Ish-presidenti i Kroacisë, Stipe Mesiq rikthehet në skenën politike në vend si kandidat për deputet në zgjedhjet e ardhshme të parakohshme parlamentare, të caktuara për më 11 shtator.
Mesiq do të jetë në listën e kandidatëve për deputet të Koalicionit Popullor, i udhëhequr nga Partia
Socialdemokratike (SDP) e ish-kryeministrit kroat, Zoran Milanoviq.
Marrëveshja për kandidaturën e Mesiqit është arritur dje në takimin e përfaqësuesve të SDP-së me delegacionin e Partisë Kroate të Pensionistëve (HSU), e cila është një nga anëtaret e Koalicionit Popullor, transmeton lajmi.net.
Lideri i HSU-së, Silvano Hrelja tha se Mesiq do të jetë kandidat për deputet në listën që përfshin rajonin e Zagrebit.
“Mesiq na tha se dëshironte të ndihmonte Koalicionin Popullor dhe ne i thamë se do të pyesim tek partnerët e koalicionit. Pyetëm dhe ata na thanë se nuk ka asnjë problem që ai të gjendet në listë”, tha Hrelja.
Sipas marrëveshjes, Mesiq do të jetë madje në vendin e dhjetë në listën e Koalicionit Popullor, por falë modelit të votave preferenciale, ka gjasa të mëdha të sigurojë mandat si deputet.
Mundësinë për rikthimin në politikë, Mesiq e paralajmëroi nga fundi i muajit prill, kur Parlamenti i Kroacisë ia hoqi zyrën, për të cilën ai kishte të drejtë zotërimi si ish-president i vendit.
“Gjatë gjashtë viteve të fundit mundohesha të mos merrem me politikën aktuale, por pasi më nxisin në politikën aktuale, angazhimi im do të jetë i vërtetë. Në çdo rast tani do të hyjë në politikë. Isha kryetar komune, kryetar i qeverisë dhe i parlamentit, në dy mandate president i vendit si dhe president i fundit i Jugosllavisë. Kam përvojë të pasur”, thotë Mesiq. /Lajmi.net/
.