Deputetë nga Komisioni për Integrime Evropiane dhe Komisoni për Punë të Jashtme, Diasporë dhe Investime Strategjike, janë takuar sot me delegacion gjerman të Partisë së Unionit Kristian-Demokrat (CDU), të kryesuar nga zëvendës Presidenti i Parlamentit Evropian, z. Rainer Wieland.
Këtë e ka bërë të ditur deputeti Elmi Reçica i cili ka thënë se gjatë këtij takimi është biseduar për tema aktuale politike si dhe është falënderuar delegacioni gjerman për mbështetjen e Gjermanisë ndaj Kosovës ndër vite.
“Me këtë rast, përveç tjerash me delegacionin gjerman diskutuam mbi agjendën evropiane të Republikës së Kosovës, kërkuam mbështetjen e politikës gjermane ndaj Kosovës lidhur me procesin e liberalizimit dhe të integrimit, mbështetjen e zhvillimit ekonomik, raportet Gjermani-Kosovë, domosdoshmërinë e njohjes së Kosovës nga ana e pesë vendeve anëtare të BE-së që ende nuk e kanë njohur, më tej delegacionin gjerman e njoftuam me aktualitetin politik si dhe procesin e dialogut ndërmjet Kosovës dhe Serbise, njëherit falenderuam delegacionin gjerman për mbështetjen e Gjermanisë ndaj Kosovës ndër vite. Poashtu, delegacioni nga Gjermania, shprehu gatishmërinë e vazhdimit të mbështetjes dhe interesimit të politikës gjermane ndaj Kosovës.” ka thënë deputeti Reçica.