Qeveria e Kosovës më në fund ka vendosur që të procedojë në Kuvend marrëveshjen e demarkacionit me Malin e Zi.
Sipas Sokol Havollit, këshilltar i kryeministrit Isa Mustafa, qeveria në mbledhjen e së mërkurës do ta procedojë në Kuvend për ratifikimin demarkacionin.
“Pastaj varet nga dinamika e Kuvendit se si do të rrjedh ky proces. Marrëveshja duhet t’i kaloj të gjitha procedurat e nevojshme si nëpër komisione po ashtu edhe në debat në seancë”, ka thënë Havolli për rtk.
Mirëpo, në anën tjetër, deputeti i Lëvizjes Vetëvendosje, Rexhep Selimi ka thënë se ata do të bëjnë çmos që ta pengojnë ratifikimin e demarkacionit.
Selimi nuk e ka përjashtuar as rikthimin e gazit lotsjellës për të penguar ratifikimin.
“Aq sa më kryeneçe është qeveria, po aq të vendosur do të jemi ne që ta kundërshtojmë”, ka thënë Selimi.
Ndërsa, deputetja e AAK-së, Teuta Haxhija ka paralajmëruar rikthimin në Kuvend kur të vije në rend dite demarkacioni.