Nesër do të fillojë faza e tretë e lehtësimit të masave nga pandemia Covid-19.
Qeveria në detyrë e Kosovës pritet që sot të marrë disa vendime të reja, në mbledhjen që mbahet në ora 18:00.
KOHA mëson se në mesin e tyre do të jetë edhe rihapja e kufijve, kopshteve, çerdheve, shkollave dhe kafiterive e restoranteve.
Sipas burimeve të KOHË-s do të bëhet rihapja e kopshteve dhe çerdheve publike e shtetërore për moshën 0-5 vjeç. Mësimi nis për klasat 9 dhe 12 në javën e dytë, përkatësisht të tretë të qershorit që testet e arritshmërisë dhe maturës të mbahen në fund të qershorit, përkatësisht në fillim të korrikut.
Gjithashtu do të hapen kufijtë e Kosovës dhe personat që hyjnë në territorin e Kosovës obligohen t’u nënshtrohen kontrolleve të ekipeve mjekësore në kufi dhe nuk shkojnë në vetizolim.
Pritet të merret vendim edhe për hapjen e kafiterive, bareve, restoranteve, qendrave tregtare, dhe do të kthehen shërbimet esenciale në secilin institucion publik dhe në farmaci.
Këto veprimtari duhet të mbikëqyren duke zbatuar rekomandimet e IKSHPK-së, si nga menaxherët e institucioneve, punëdhënësit, ashtu edhe inspektoriatet përkatëse.