Disa qytetarë nëpërmjet rrjetit social “Facebook” kanë bërë thirrje për protesta gjithëpopullore në Mitrovicë, për të kundërshtuar invadimin politik, kulturor dhe kolonizimin e veriut nga Serbia. Protesta është paralajmëruar për sot (e diel) duke filluar nga ora 16:00 në qendër të Mitrovicës, për të kundërshtuar ndërtimin e lagjes së serbëve “Lugina e Diellit” dhe kundër vendosjes së shtatores së “Car Llazarit”.
Thirrja e protestës u bë në rrjetin social “Facebook”, organizatorët e të cilëve nuk dihen. Deri më tash 1,1 mijë persona e kanë konfirmuar pjesëmarrjen. Por, nga ana tjetër, edhe opozita, por edhe kryetari i Komunës së jugut, Agim Bahtiri, kanë bërë thirrje që protesta të anulohet, derisa nuk ka këshill organizativ, shkruan sot gazeta “Zeri”.
Nga 8 mijë të ftuar, 1.1 e kanë konfirmuar pjesëmarrjen në këtë protestë që po pretendojnë që është gjithëpopullore dhe 1.6 mijë kanë pasur interes për ngjarjen.
Për këtë protestë njohësit e çështjeve të sigurisë thonë se situata mund të përkeqësohet në rast të ndonjë proteste afër “Urës së Ibrit”.