Bazuar në Strategjinë e Integruar të Policimit të Drejtuar nga Inteligjenca dhe Policimit në Bashkësi, Drejtoria Rajonale e Policisë në Ferizaj në bashkëpunim me drejtoritë e arsimit, ka thirrur në takim të gjithë drejtorët e shkollave të mesme të larta të rajonit të Ferizajt, takim ky që u mbajt sot me datën 06.03.2022 nga ora 10:00 në Drejtorinë Rajonale të Policisë në Ferizaj.
Të pranishëm në këtë takim ishin: Përfaqësuesi nga drejtoria e arsimit e komunës së Ferizajt dhe drejtorët e shkollave të mesme të larta nga komunat : Ferizaj, Kaçanik, Shtime, Shtërpcë dhe Hanit të Elezit.
Drejtori Rajonal i policisë, Nënkoloneli Basri Shabani para të pranishmëve tha se janë mbajtur ligjerata, pothuajse në të gjitha shkollat e mesme të larta në rajonin e Ferizajt me tema të ndryshme në vetëdijësimin e nxënësve në parandalim e dukurive negative, po ashtu shpalosi edhe trendin e rasteve kriminale të incidenteve nëpër shkolla dhe rreth tyre gjatë vitit 2022 dhe në fillim të vitit 2023.
Në këtë takim u vlerësua dhe u lavdërua puna e mirë e policisë për bashkëpunimin me drejtorët e shkollave në identifikimin dhe kapjen e personave që prishin rendin dhe qetësinë publike rreth dhe nëpër shkolla.
Drejtori Rajonal i Policisë i siguroi të pranishmit se policia rajonale do të vazhdojë me ligjerata në shkolla dhe do të shtojë aktivitetet e policisë, veç policëve me uniformë do të angazhojë edhe pjesëtarë të policisë me rroba civile me një ‘’Task Forca’’ në parandalim të dukurive negative rreth dhe nëpër shkolla.
Në fund të këtij takimi u rekomandua që:
- Të ketë patrullime më të shpeshta të policisë në afërsi të shkollave gjatë ndërrimeve .
- Në koordinim me Prokurorinë Themelore në Ferizaj, të informohen drejtorët e shkollave të mesme të larta për nxënësit që janë përfshirë në incidente.
- Të vazhdohet me ligjeratat e policisë nëpër shkollat e mesme me tema të ndryshme për dukuritë negative.
- Në koordinim me Drejtoritë e Arsimit, Prokurorinë dhe Gjykatën Themelore, të kryhen kontrolle nga ana e policisë në shkolla.
- Të kontrollohen lokalet në afërsi të shkollave nga ana e policisë