Ka 8 vjet që ka nisur puna në ndërtimin e rrethrrotullimit kryesor në Prishtinë, por po punohet shumë ngadalë.
I nisur në vitin 2010, shkaku i telasheve me shpronësimet, projekti është zvarritur tej mase, raporton KTV.
Pas një kohe të gjatë, kah mesi i muajit gusht, ka rifilluar puna, pasi është arritur një marrëveshje ndërmjet Komunës së Prishtinës dhe Doganës, për pronën e kësaj të fundit, e cila mbante peng vazhdimin e punimeve.
Megjithatë, problemi i shpronësimit ende nuk është zgjidhur plotësisht.
Një marrëveshje duhet të arrihet edhe me ndërmarrjen “InfraKos”, meqë një pjesë e rrugës ndeshet me hekurudhën.
Në “InfraKos” thonë se janë gatshëm që të gjejnë një zgjidhje me komunarët vetëm nëse nuk cenohet liria e transportit.
Ky rrethrrotullim e lidh magjistralen Prishtinë-Mitrovicë me atë Prishtinë-Ferizaj dhe magjistralen me Fushë Kosovën, e cila rrugë lidh shumë qytete, përfshirë edhe qasjen në autostradën “Ibrahim Rugova”.