Ndër aktivitetet e shumta të organizuara gjatë tetorit apo siç njihet “Muaji Rozë”, në Ferizaj, sot u mbajt ecja tradicionale me qëllim ndërgjegjësimin për rëndësinë që kanë kontrollet e shpeshta dhe zbulimi i hershëm i kancerit të gjirit.
Ecja është bërë nga Qendra Kryesore e Mjekësisë Familjare, për të vazhduar deri tek sheshi i qytetit “Adem Jashari”, ndërsa moto ka qenë “Zbulim i hershëm – mbijetesë”. Ky organizim u bë nën patronatin e Drejtorisë së Shëndetësisë dhe Mirëqenies Sociale në Ferizaj.
Në këtë ecje kanë marrë pjesë drejtues të pushtetit lokal, anëtarë të Kuvendit të Komunës, mjek e infermierë, por edhe shumë qytetarë.
Me këtë rast në sheshin e qytetit në Ferizaj, është bërë edhe shfaqja e një ekspozitë e përgatitur nga mësimdhënësit dhe nxënësit e shkollës së arteve “Çesk Zadeja” në Ferizaj.
Drejtori i Shëndetësisë dhe Mirëqenies në Ferizaj. Dr. Kemajl Emini, dhe Dr. Xhevdet Haxhidema janë shprehur se qëllimi kryesor i këtij manifestimi është ndërgjegjësimi i shoqërisë për rrezikun nga kanceri i gjirit dhe krijimin e kushteve më te mira për zbulimin e hershëm dhe trajtimin optimal të kësaj sëmundje.
Në Ferizaj, janë kryer mbi 500 mamografi prej tyre 57 janë në trajtim e sipër nga kjo sëmundje.
Profesionistët shëndetësorë kanë përsëritur thirrjet për më shumë kontrolle dhe vizita për çdo ndryshim në trup.