Ministria për Forcën e Sigurisë së Kosovës, ka njoftuar sot se ka ndërruar jetë oficeri i FSK-së, kapter Hiser Muja, i cili aktualisht po kryente punën e zëvendëskomandantit të togut të mbështetjes në kazermën “Skënderbeu” në Ferizaj.
“Me pikëllim të thellë njoftojmë të gjithë pjesëtarët e FSK-së, MFSK-së dhe të gjithë miqtë, shokët dhe dashamirët se ka ndërruar jetë oficeri i FSK-së kapter Hiser MUJA. Aktualisht kapter Hiser Muja ka qenë duke kryer detyrën e zëvëndës komandantit të togut të mbështetjes në kazermën ‘’SKËNDERBEU’’ Ferizaj. Kapter Hiser Muja është I lindur në Prizren me 04.02.1970, Prizren, ku edhe ka qenë me vendbanim. Kapter Hiser MUJA ka qenë pjestarë i Ushtrisë Çlirimtare të Kosovës në Zonën Operative të Pashtrikut, pjesëtarë i Brigadës 125. Pas transformimit të UÇK-së në TMK kapter Hiser MUJA ka shërbyer në Zonën e Dytë Mbrojtëse në Brigadën 321”, thuhet në njoftim.
Muja ka qenë i martuar dhe ka pasur tre fëmijë, dy djem dhe një vajzë. Ka jetuar në qytetin e Prizrenit me vendbanim në lagjen “Alajdin Xhezairi”.