Për të dytën herë radhazi ka dështuar të mbahet seanca gjyqësore në çështjen civile ku paditësi Avdi Hashani, kërkon nga kompanitë “Bechtel-Enka” dhe “Jaha Company”, kompensim dëmi, pasi pretendon se gjatë punimeve për ndërtimin e autostradës i është dëmtuar shtëpia e tij që gjendet në fshatin Mirash të Ferizajt.
Seanca e caktuar të mbahet të enjten në Gjykatën Themelore në Ferizaj nuk është mbajtur, kjo pasi që ka munguar përfaqësuesi i kompanisë “Bechtel-Enka”. Gjykatësit Ardian Ajvazi deklaroi se përfaqësuesit të kompanisë “Bechtel-Enka” mund t’i mos ketë arritur me kohë ftesa përmes postës, pasi sipas tij ka pas ngarkesë dhe vonesa në dërgimin e ftesave. Prandaj, seanca e radhës për këtë çështje pritet të mbahet më 14 gusht, në ora 11:00.Paraprakisht kjo seancë ishte caktuar të mbahej më 9 korrik, mirëpo të njëjtës i ishte ndërruar data për shkak të grevës së punëtorëve administrativë të gjykatave dhe prokurorive. Ndryshe, edhe seanca e fundit, e caktuar të mbahej më 7 qershor, ishte shtyrë për arsye se ka munguar eksperti i minierave, Sefedin Kastrati, dhe përfaqësuesi i të paditurës së dytë, kompania “Jaha Company”, Paditësi Hashani, pretendon se me rastin e detonimit dhe eksploatimit të sipërfaqes tokësore, sidomos me datën 16 shtator 2016, kishte ardhur deri tek plasaritja e jashtme e shtëpisë dhe se sipas tij, ekziston rreziku që ato dëme të jenë edhe më të mëdha gjatë kryerjes së punimeve.
Sipas padisë, përveç caktimit të ekspertizës për dëmin e shkaktuar, paditësi Hashani, kërkon të realizohet edhe kamata ndëshkuese nga dita e paraqitjes së padisë e deri në pagesën definitive si dhe të kompensohet për shpenzimet e procedurës kontestimore në afatin prej 15 ditësh, pas plotfuqishmërisë së aktgjykimit nën kërcënim të dhunshëm./Lajmi.net