Federica Mogherini ka thënë se duhet të merret një vendim final për liberalizimin e vizave për Kosovën.
Ka ardhur koha për liberalizimin e vizave për Kosovën, ka thënë përfaqësuesja e lartë për politikë të jashtme dhe siguri e Bashkimit Evropian, Federica Mogherini në Helsinki, pas takimit të Ministrave të punëve të jashtme të shteteve anëtare të BE-së dhe Ballkanit Perëndimor.
Sipas saj, Komisioni Evropian ka thënë se ka ardhur koha të hiqen vizat për shtetasit e Kosovës.
“Vendimin për këtë duhet ta marrë Këshilli i Evropës dhe është koha e fundit të ndodh. Shpresoj që shtetet e BE-së do ta marrin atë vendim”, theksoi Mogherini.
Kurse, ajo ka shtuar se Ballkani Perëndimor është shumë i rëndësishëm nga aspekti strategjik për BE-në dhe duhet të integrohet ajo hapësirë.
“Nga aspekti strategjik është me rëndësi që BE-ja të jetë e bashkuar sa i përket zgjerimit të saj. Shtetet e Ballkanit Perëndimor kufizohen me shtetet anëtare të BE-së dhe krijojnë një ishull brenda Bashkimit”, deklaroi ajo.
Ajo theksoi se inkuadrimi i Ballkanit Perëndimor në BE është i rëndësishëm edhe për pajtimin e atyre shteteve që kanë luftuar para 20 vjetësh. Asnjë kriter botëror nuk është i shfaqur në atë hapësirë si BE, sa i përket tregtisë dhe investimeve, theksoi Mogherini.