Kam 56 vjet që e ushtoj këtë zanat. Tash ka pak punë, jo si përpara, thotë këpucëtari, Qemajl Sojeva
Ai është njëri nga pesë mjeshtrit e riparimit të këpucëve në Ferizaj, që po i reziston vështirësive të kohës dhe metodave moderne të punës.
“Mosha më ka lodhur pak, mirëpo ende kam dëshirë të flaktë ta punoj në këtë zanat. Vetëm këtu e gjej prehjen, qetësinë dhe vullnetin e jetës”, thotë ai për Kosova Sot.
Sojeva shprehet i shqetësuar se zanatet më nuk po i do askush: as të rinjtë, e as institucionet që nuk po tregojnë kujdes që sadopak ta stimulojnë këtë veprimtari. Por, megjithatë është i lumtur që djali i tij, Gentoni, po trashëgon njohuritë që ka mbledhur ndër vite.
“Zanati është shumë i dobishëm për këdo. Duhet mjaft seriozitet e durim, gjë të cilën ia përsëris shpesh djalit tim “, thotë Qemajl Sojeva, i cili nuk e di saktë numrin e këpucëve që ka pasur nëpër dorë, por shprehet i sigurt që ky numër të jetë mbi 500 mijë palë.