Kryetari i Komunës së Drenasit, Ramiz Lladrovci ka rifilluar polemikat me ish-bashkëpartiakun e tij, Jakup Krasniqi. Përmes një statusi në Facebook, Lladrovci e ka quajtur Krasniqin jo më të madh se një ‘mësues fshati’. Reagimi i të parit të Drenasit erdhi pas deklaratave të Jakup Krasniqit, kryetari i Këshillit Kombëtar të Nismës Socialdemokrate, lidhur me marrëdhëniet e Hashim Thaçit dhe Kadri Veselit me heroin Adem Jashari. Këto deklarata sipas Lladrovcit, po i prishin qetësinë edhe heronjve. “ Edhe heronjve tonë të pavdekshëm po ua prish qetësinë. Për egon tënde. Ti Jakup nuk ke qenë për ato punë që pretendon. Nuk e ke as me meritë. Mësues fshati e kishe vendin, ashtu siç të vlerësuan të pavdekshmit e kombit që tash janë në libra historie. Ti gabon rëndë me vlerësime për emrat që i përmend. Ti ke dëshirë të flasësh për tema të mëdha. Edhe kur flet për Adem Jasharin, Hashim Thaçin e Kadri Veselin, ti do me u dukë i madh sa ata. Problem Jakup”, shkroi Lladrovci. Ai po ashtu e quajti Krasniqin një person që nuk e dëshiron unitetin. “Ta ka treguar komuna e Drenasit vendin disa herë, ty e vëllait tënd. Le politikën. Nuk ke kohë të korrigjohesh. Tashmë je vetëm duke rikënduar këngët që të gjithë i dinë nga ti, përçarjen dhe mosmirënjohjen . Ktheu te kosa e mos u korit”, përfundoi Lladrovci./Indeksonline/