Shpërthimi në Ferizaj që lëndoi mbi 40 persona, nuk dihet ende se sa dëme materiale shkaktoi.
Përveç në lokalin ku shpërtheu bombola e gazit, dëme të konsiderueshme u shkaktuan edhe në bizneset përreth. Njëra prej shitoreve të afërme vazhdon të jetë e mbyllur që nga e marta, kur ndodhi shpërthimi. Flakët dogjën shumicën e mallit që gjendej në depon e këtij dyqani, që gjendet ngjitur me lokalin ku ndodhi shpërthimit. Ndërsa fuqia e shpërthimit dëmtoi edhe një pjesë të infrastrukturës së objektit, raporton Koha.
Drejtori i këtij biznesi, Mehdi Shala, thotë se ende nuk e dinë nëse kompania që siguron qendrën tregtare ku gjendet dyqani do t’ua mbulojë shumën e dëmit.
“Sa u përket dëmeve materiale, ato janë të konsiderueshme. Dëme direkte në mall, pastaj në objekt dhe tash jemi në fazën e konsolidimit dhe analizimit se sa janë dëmet konkrete. Pasi të bëhet analizimi i dëmeve të shikojmë mundësitë e ndihmave në kuptimin e taksave të ndryshme që ne i kemi si kompani. Keni parasysh situatën e vitit 2020, nuk ka qenë shumë e dobishme për bizneset. Në atë drejtim çdo mundësi që kanë autoritetet për të ndihmuar do të kishte qenë shumë e mirëseardhur”, është shprehur Shala, i cili ka treguar se katër prej të lënduarve janë punonjës të tij.
Pothuajse tërësisht është shkatërruar edhe një barnatore, e cila gjendet fare pranë vendit të shpërthimit.
Në anën tjetër, institucionet akoma nuk kanë përfunduar vlerësimin e shumës së dëmeve, derisa Komuna e Ferizajt thotë se kjo nuk është kompetencë e saj.
Zëdhënësi i Komunës, Albion Sherifi, thekson se kanë mundësi t’u ndihmojnë bizneseve vetëm me nga një mijë euro.
“Komuna e Ferizajt do të përpiqet që të ndihmojë bizneset, qoftë biznesin që është i atakuar nga ky shpërthim, por edhe bizneset e tjera me mundësitë e saj buxhetore. Ka një rregull të subvencionimit në raste të tilla që është shuma afërsisht një mijë euro, për të cilat mund të merret vendimi nga kryetari i Komunës për t’iu dalë në ndihmë këtyre bizneseve”, ka deklaruar Sherifi.
Katër prej gjashtë të lënduarve me gjendje të rëndë pas këtij shpërthimi janë duke u trajtuar në Turqi, kurse gjatë së shtunës dy të tjerët janë dërguar për të vazhduar shërimin në Austri. Hetimet për mënyrën se si ndodhi shpërthimi akoma nuk kanë përfunduar.