Këtë të martë Kryesuesja e Kuvendit të Komunës së Ferizajt, Kristina Gashi-Bytyçi, ka mbajtur mbledhjen e dhjetë të Komitetit për Politikë dhe Financa.
Anëtarët e këtij komiteti kanë diskutuar për propozim vendimin për aprovim të Statutit të Muzeut të Kujtesës, ku këtë pikë të rendit të ditës e ka prezantuar drejtorja e Drejtorisë së Kulturës, Rinisë dhe Sportit në Ferizaj, Xhemile Murati-Shabani. Në lidhje me këtë pikë të rendit të ditës pati diskutime nga të gjithë anëtaret e KPF-së të përfaqësuar nga të gjitha partitë politike.
Ndërkaq drejtori i Pronës, Gjeodezisë dhe Kadastrit, Sabri Murseli, ka propozuar 4 pika të rendit të ditës për shpallje të interesit të përgjithshëm të disa ngastrave kadastrale si në fshatin Mirosalë, Babush i Serbëve, Papaz si dhe Pleshinë.Në këtë mbledhje u diskutua edhe për hedhjen në diskutim publik të Draft Rregullores për Taksa, Tarifa dhe Ngarkesa Komunale.
Ndërsa drejtorja e Financave Sebahate Ajeti-Sadiku, ka prezantuar shkurtimisht edhe raportin financiar për periudhën janar-shtator të vitit 2019, si dhe ka bërë edhe propozim-vendimin për ridestinimin e mjeteve për vitin fiskal 2019.
Mbledhja e Kuvendit të Komunës do të mbahet me datën 31 tetor duke filluar nga ora 10:00.