Presidenti Hashim Thaçi, pas ceremonisë së inaugurimit, ka pritur në takim bilateral, homologen e tij kroate Kolinda Grabar-Kitaroviq
Në këtë takim, Thaçi ka falënderuar atë për mbështetjen që Kroacia i ka dhënë Kosovës në periudha të ndryshme.
“Unë dhe populli i Kosovës jemi mirënjohës për mbështetjen që Kroacia i ka dhënë vendit tonë. Prania e juaj sot këtu dëshmon këtë përkushtim”, ka thënë ai.
Në anën tjetër, kryetarja e Kroacisë, Kolinda Grabar-Kitaroviq, ka uruar liderin e ri të Kosovës për marrjen e postit të ri, duke i siguruar mbështetje të plotë dhe bashkëpunim ndërshtetëror për të gjitha çështjet me interes të të dyja vendeve.
“Urime të përzemërta për postin e ri. Do të keni mbështetjen time të plotë dhe të popullit kroat”, ka thënë ajo, transmeton Klan Kosova.