Kreu i Kuvendit kishte deklaruar javë më parë se muri ilegal, i ndërtuar nga serbët, do të hiqet më së largu në fillim të muajit shkurt, para përvjetorit të nëntë të pavarësisë së Kosovës.
I ndodhur në SHBA për takime të shumta me zyrtarë të lartë amerikanë, Veseli ka shkruar në llogarinë e tij në Facebook se mure ndarëse nuk do të ketë në Kosovë.
“Komunikimi dhe lëvizja e lirë, krahas zhvillimit ekonomik, frymës demokratike dhe shtetit ligjor, do të jenë vendosmëri e institucioneve dhe qytetarëve tanë në shtetin tonë të pavarur, Republikën e Kosovës. Mitrovica do të jetë qytet i bashkuar dhe i lirë në lëvizje dhe qendër e emancipimit qytetar në Republikën e Kosovës”, ka shkruar Veseli.
Ai ka falënderuar Përfaqësuesen e BE-së dhe Ambasadorin e SHBA-së për kontributin e jashtëzakonshëm për zgjidhjen e çështjes që lidhet me murin.
“Qytetarët e Mitrovicës dhe të tërë Kosovës duhet të besojnë në shtetin e tyre dhe në rrugëtimin euroatlantik”, ka shkruar Kryeparlamentari Veseli në Facebook.