Ka dhënë dorëheqje nga pozita e drejtorit të Agjencisë Kosovare për Inteligjencë, Shpend Maxhuni.
Lajmin e bëri të ditur kryeministri në detyrë, Ramush Haradinaj, duke e falënderuar atë për punën e deritanishme.
Në ditën e dorëheqjes Haradinaj ka dekoruar Maxhunin me Medaljen e Skënderbeut.
“Z. Maxhunin e falënderova për bashkëpunimin profesional të deritashëm në mbrojtjen e sigurisë së vendit dhe popullit tonë.Për kontributin e tij në obligimet shtetërore dhe Institucionale e dekorova z. Maxhunin me Medaljen e Skenderbeut, me motivacionin për profesionalizëm dhe besnikëri në shërbim ndaj atdheut”, ka shkruar Haradinaj.
“Gjatë këtij mandati, Qeveria e Kosovës është angazhuar pandalë në forcimin e rendit dhe ligjit në vend dhe institucionet e sigurisë. Në këtë angazhim, roli i z. Maxhunit ka qenë i rëndësisë së veçantë dhe sot, AKI është një ndër institucionet më profesionale dhe më kredibile në vend dhe më gjerë”.
Maxhuni nuk ka dhënë arsyet e dorëheqjes.