Deputeti i vetëm shqiptar nga radhët e Partisë për Veprim Demokratik në Parlamentin e Serbisë, Fatmir Hasani ka treguar se ky subjekt politik është duke negociuar me fituesin e zgjedhjeve në Serbi, Aleksandar Vuçiq për t’u bërë pjesë e Qeverisë së re.
Ai ka thënë se me hyrjen e PVD-së në Qeverinë serbe kanë marrë sugjerime edhe nga ambasadori shqiptar dhe ai amerikan në Beograd.
Në një intervistë për ‘Epokën e re’, ai ka thënë PVD do të jetë pjesë e kësaj Qeverie vetëm nëse plotësohen kërkesat që janë shtruar në takimin e parë me Vuçiqin.
Sipas tij, deri më tani mandatari për formimin e Qeverisë serbe ka treguar gatishmëri për ta plotësuar vetëm një kërkesë të tyre, që kjo parti ta udhëheqë Trupin koordinues për Preshevë, Bujanoc dhe Medvegjë.