Ferizaj. 01.10.2017. Në takim me strukturat e AAK-së dega në Ferizaj, Kryeministri i Republikës së Kosovës z.Ramush Haradinaj, u ka premtuar atyre se dinamika e shpejtë e punës në Qeverinë e Kosovës, do të bartet edhe në këtë komunë.
“Kjo nuk është vetëm një qeveri që i dëgjon hallet, por është një qeveri që vepron. Një qeverisje e tillë me këtë dinamikë, jo vetëm që merret me temat që janë akumuluar me kohë, por edhe të avancojë tutje,” është shprehur Haradinaj.
Haradinaj i ka ftuar qytetarët e Ferizajt që të besojnë në fitoren e kandidatit Xhavit Zariqi, pas kalimit në raundin e dytë zgjedhor.
“Ju ftoj në këto zgjedhje ta shtoni vetëbesimin dhe të besoni në fitore. Nuk e keni të pamundur që të hyni në raund dytë, kësaj radhe,” ka vlerësuar Haradinaj.
Në anën tjetër, kandidati për kryetar të Komunës së Ferizajt, z.Xhavit Zariqi, u ka premtuar të pranishmëve në këtë takim se qeveria e udhëhequr nga kryeministri Haradinaj, do të jetë shumë pranë tyre. Ai është shprehur se Ferizaj nën udhëheqjen e tij do të përfitojë në zhvillim ekonomik dhe në përmirësim e jetës së qytetarëve.