Shala e Bajgorës shquhet për numër të madh të fshatrave, të cilat shtrihen në një terren malor dhe që kanë bukuri përrallore.
Një ndër këto fshatra është edhe Kutllovci, i cili sot pothuajse është i pashkelur.
40 shtëpi sa kishte dikur, sot kanë mbetur vetëm muret e zbrazura dhe bukuritë e natyrës, të cilat kanë mbetur të pikturuara si në letër, pa i shkelur njeri.
Isuf Abazi është banori i vetëm i cili kthehet në këtë fshat për t’i kullotur 300 dhi.
‘Janë afër 300 krerë. Zgjohem në ora 6:00 dhe i mjelim e dërgojmë qumështin në shitore. Ndërrohemi më vëllain kohë pas kohe. E kemi biznes familjar’, shprehet Isuf Abazi për RTV Dukagjinin.
Të ngjitesh përgjatë bregoreve e vetmja gjë që dëgjon është tingulli i flladit të lehtë dhe cicërimat e zogjve që kishin mbuluar fshatin e braktisur.
Përveç pamjes përrallore, nga ky fshat shihet e pothuajse e tërë Mitrovica. Isuf Abazi thotë si dikur në këtë fshat kishte plot gjallëri, por pas lufte fshati u braktis.
‘Kemi jetuar deri në luftë. Kemi qenë rreth 40 shtëpi. Ne jemi marrë me bujqësi ndërsa prindi ka punuar në Trepçë, por pas lufte jemi shpërngulë’, deklaroi Abazi.