Fotografja Bardha Goga është fitues në Ekspozitën Kundër Korrupsionit, kurse Agon Nimani për video. Bardha është shprehur e lumtur për këtë çmim. Fotografia e saj është prekëse, ku shihen fëmijët me një karrocë duke punuar dhe mbajtur familjen. “E lumtur tejmase, foto ime arriti të paraqes realitetin e trishtë ne vendin tonë. Sot në ditën ndërkombëtare kundër korrupsionit kam fituar vendin e parë në Kosovë në Ekspozitën garuese fajikorrupsionit e cila ekspo është mbajtur ne Prishtinë, nga Instituti Demokratik i Kosovës dhe Transparency International”, ka thënë Bardha.
Bardha Goga
Instituti Demokratik i Kosovës (KDI), ka mbajtur ekspozitën e fotografive dhe ceremoninë e ndarjes së çmimeve për tri vendet e para në garën e fotografive dhe videove #fajikorrupsionit, me rastin e shënimit të 9 dhjetorit, Ditës Ndërkombëtare Kundër Korrupsionit. Qytetarët që kanë aplikuar me anë të fotografisë është dashur të paraqesin pasojat e korrupsionit, ndërsa përmes videos të japin idetë e tyre se si të luftohet kjo dukuri.
Kurse Shaip Havolli, drejtor i Agjencisë Kundër Korrupsionit në Kosovë, ka thënë se sa i përket luftimit të korrupsionit flasin edhe fotografitë këtu prezentë që shumë mirë e pasqyrojnë nivelin e korrupsionit në vendin tonë. “Pra niveli i korrupsionit në vend është i lartë edhe përkundër angazhimeve të institucioneve për zbatim të ligjit në këtë rast edhe të Agjencisë kundër korrupsion. Jemi të mobilizuar që sa më shumë ta luftojmë bashkërisht edhe me institucione të tjera. Shoqëria civile në këtë rast është shumë aktive. Nga shoqëria civile, në këtë rast KDI kemi marrë shumë informacione gjatë këtij viti sa i përket disa situatave që kanë të bëjnë me çështje të konflikt të interesit, çështje në prokurim publik dhe fusha tjera”, ka shtuar ndër të tjera ai.
Ndërsa Florent Spahija, zyrtar ligjor në KDI, ka potencuar se pjesë e pa ndashme e punës së KDI-së çdo ditë është dhënia e këshillave ligjore pa pagesë për qytetarët që duan ta raportojnë korrupsionin, sinjalizuesit e korrupsionit dhe dëshmitarët e korrupsionit. Të drejtat e punëtorëve, integriteti në sistemin e drejtësisë, financimi i subjekteve politike dhe Prokurimi publik janë fushat që KDI është angazhuar vazhdimisht.
“Në këtë ditë, kur po shënojmë Ditën ndërkombëtare kundër korrupsionit i bëjmë thirrje Qeverisë së Kosovës që të shkarkoj ministrat dhe zëvendësministrat me aktakuza […] po ashtu rikthejmë vëmendjen duke kërkuar sërish dorëheqjen e kryeprokurorit të shtetit z. Lumezi. Gjithashtu i bëjmë thirrje prokurorisë dhe policisë që të bashkohen në luftë kundër korrupsionit dhe njëkohësisht gjykatat në dënime më të ashpra për të korruptuarit”, ka shtuar Spahija.
Ndryshe, në garë gjithsej ishin 115 fotografi dhe video, të cilat janë vlerësuar nga juria profesioniste. Këto gara janë zhvilluar në kuadër të aktiviteteve të KDI në Muajin Kundër Korrupsionit dhe mbështeten nga Ministria e Punëve të Jashtme e Gjermanisë dhe Ambasada Gjermane në Kosovë.
Fitues të foto garës janë:
1. Bardha Goga
2. Milot Krasniqi
3. Altin Gashi
Fitues të video garës janë:
1. Agon Nimani
2. Florent Kastrati
3. Basri Oruqaj