Ferizaj.22.01.2018 . Komuna me nismë për riorganizimin e Klubit të Futbollit “Ferizaj”, zgjedhen anëtarët e grupit punues
Gjatë pasdites së sotme, kryetari Agim Aliu i shoqëruar edhe nga nënkryetari Naim Ferati si dhe drejtoresha e Drejtorisë së Kulturës,Rinisë dhe Sportit, Xhemile Murati – Shabani ka pritur në takim veteranët e futbollit si dhe donatorët ferizajas. Me këtë rast kryetari Aliu u shpreh se Komuna e Ferizajt është e interesuar ta vë në funksionalitet gjithë mekanizmin e saj sportiv për ta kthyer KF “Ferizaj” në majën e renditjes tabelare.
Ndër të tjera, kryetari Aliu theksoi se ka vetëm një rrugë për zgjidhjen e statusit ligjor të klubit të futbollit, duke e shndërruar atë në shoqëri aksionare nga statusi i organizatës joqeveritare me të cilën funksionon aktualisht.
Veteranët e futbollit përshëndetën këtë nismë të kryetarit Aliu duke ofruar mbështetjen e tyre të pa rezervë për të çuar përpara zhvillimin e sportit ferizajas, përkatësisht riorganizimin dhe mirëfunksionimin e Klubit të Futbollit “Ferizaj”.
Nisma e Komunës së Ferizajt ka të bëj me themelimin e një grupi punues i cili mision kryesor ka që në fazën transitore të përgatis klubin për reformën e thellë dhe ndryshimet statutore të funksionimit të tij. Me propozimet e të pranishmëve u zgjodhën përfaqësuesit në grupin punues, i cili do të përbëhet nga:
1. Adil Reshani; 2. Betim Çerkini; 3. Sylejman Rrahmani; 4. Sadush Rysha; 5. Naser Sinani; 6. Genc Hyseni; 7. Nadir Haxhimusa; 8. Isa Ismajli; 9. Bashkim Mehmeti;
Edhe dy propozime që do të bëhen ndërkohë nga veteranët e futbollit ferizajas.
Ky grup punues, kjo task-forcë është hapi i parë institucional për këndelljen e klubit të futbollit ferizajas me qëllim kthimin e saj në një klub konkurrent dhe efikas, aty ku gjatë historisë e ka pasur vendin.