Prokuroria Themelore në Ferizaj ka ngritur dy aktakuza për falsifikim të testeve COVID-19 ndaj dy personave.
Lajmin për ngritjen e aktakuzave e ka konfirmuar zëdhënësja e kësaj prokurorie, Vjosa Baftiu.
“Një aktakuzë është ngritur kundër një (1) personi për shkak të dyshimit të bazuar të veprës penale “Falsifikimi i dokumenteve” nga neni 390 paragrafi 1 të Kodit Penal të Republikës së Kosovës (KPRK). Ndërsa, aktakuza tjetër është ngritur ndaj një personi për shkak të dyshimit të bazuar të veprës penale “Rastet e posaçme të falsifikimit të dokumenteve” nga neni 391 paragrafi 1 nënparagrafi 1.1 të Kodit Penal të Republikës së Kosovës (KPRK)”, ka konfirmuar Baftiu për KALLXO.com
Raste të falsifikimit të testeve janë evidentuar pothuajse në të gjitha komunat e Kosovës.
Policia e Kosovës ka arrestuar dhjetëra persona në Prizren, Pejë, Mitrovicë, Ferizaj, Gjilan e Prishtinë.