Ministri për Integrime Evropiane, Bekim Çollaku ka thënë për herë të parë se ratifikimi në Kuvend i demarkacionit me Malin e Zi nuk është kusht për liberalizimin e vizave.
Këtë ai ia ka thënë televizionit publik në një intervistë gjatë ditës së sotme.
“Kusht ka qenë që ne të bëjmë përëjkekje që të gjejmë zgjidhje, por jo që të ratifikohet”, ka thënë Çollaku.
Deri tash demarkacioni me Malin e Zi ishte përmendur si njëri ndër kushtet shtesë për liberalizimin e vizave për kosovarët.
Kohëve të fundit është rritur numri i deputetëve të pozitës që kanë shprehur kundërshtimin për mënyrën se si është përcaktuar vija kufitare mes Kosovës dhe Malit të Zi. Në mesin e tyre edhe shefi i deputetëve të PDK-së, Adem Grabovci. Kanë thënë se duhet rishikuar edhe nënkryetari i Kuvendit të Kosovës, Xhavit Haliti e deputetet e LDK-së, Melihate Tërmkolli e Besa Gaxherri.
Më i zëshmi i deputetëve të shumicës kundër demarkacionit ka qenë deputeti i LDK-së, gjeografi Shpejtim Bulliqi.