Pas investimeve infrastrukturore në 8 institucionet arsimore publike në komunat Ferizaj dhe Çair, si pjesë e programit të BE-së për bashkëpunim ndërkufitar, projekti CBCEcoKid organizoi gara konkurruese me përfshirjen e nxënësve të shkollave: Gjimnazi ‘Kuvendi i Arbërit’; ‘Jeronim De Rada’ dhe ‘Gjon Serreçi’ në Ferizaj si dhe shkollave: ‘Hasan Prishtina’, ‘Imri Elezi’ dhe ‘Liria’ në Çair, duke i dhënë frymën e fuqishme të bashkëpunimit, që në thelb është edhe misioni i Projektit.
Përveç angazhimit praktik në aktivitet e organizuara në të dy komunat partnere të projektit, nxënësit e këtyre 6 shkollave garuan në temat: ‘Efiçienca e Energjisë’, ‘Mbrojtja e Mjedisit’ dhe ‘Ndotja e Ajrit’, duke punuar edhe ese lidhur me këto tema.
Fillimisht, nxënësit garuan me moshatarët e tyre brenda shkollave respektive dhe pastaj 6 esetë e vlerësuara si më të mirat, 3 në Ferizaj dhe 3 në Çair, u vlerësuan nga një komision i veçantë i caktuar nga drejtoritë e arsimit në të dy komunat partnere respektive.
Përfundimisht, fituesit e përzgjedhur në këtë garë ishin: Dion Sherifi, nxënës i SHMFU ‘Gjon Serreçi’ në Ferizaj, cili garoi me temën ‘Mrojtja e Mjedisit’ dhe nxënësja Munisa Haxhiu nga shkolla ‘Liria’ në Çair e cila garoi me temën ‘Efiçienca e Energjisë’.
Si rezultat i kësaj gare, dhe përkushtimit të treguar, projekti CBCEcoKid ka mundësuar vendosjen e ‘Pemë të mençura’ në hapësira publike të komunave partnere. ‘Pema e Mençur’ është një konstruksion metalik me tavolinë dhe ulëse, i pajisur me panele diellore, inverter dhe me porta e sistem ‘wireless’ për karikim të pajisjeve elektronike.