“Është informuar për qëndrimin tim dhe të PD-së për vazhdimin e negociatave për të zgjidhur këto dy çështje, si dhe vullnetin tonë për ta bërë këtë në sytë e opinionit publik, në mënyrë që të shmanget çdo politizim dhe çdo keqpërdorim politik në këtë fazë të fundit të reformës në drejtësi nga cilado palë, ndonëse është e qartë se cila e përdor për kapital politik dhe përfitim elektoral, dhe cila palë po bën gjithçka për një reformë që t’u shërbejë shqiptarëve dhe jo partive politike”, informoi Basha.
Sa i përket qëndrimit të opozitës mbi miratimin e kësaj reforme, ai thotë “Qëndrimi i grupit është unanim, koheziv”.
“PD është për miratimin e kësaj reforme, pro draftit kushtetues bazuar mbi propozimin hibrid, me të gjitha rakordimet e brendshme dhe është gati që dy çështjet e shtruara në çastet e fundit t’i shtrojë për zgjidhje. Një vullnet pozitiv që priret nga zgjidhja dhe jo bllokimi, nga vota konsensuale që meriton reforma në drejtësi, dhe jo nga skemat politike që dëmtojnë themelin e shëndoshë mbi të cilën duhet të qëndrojë kjo reformë. Nga sot qëndrojmë në gatishmëri dhe të hapur për negociata, fuqimisht në parimet e shpallura nga SHBA, BE dhe Komisioni i Venecias, e jemi gati të ofrojmë, të kërkojmë dhe të pranojmë zgjidhje të argumentuara në bazë të kësaj kornize parimesh fare të qartë. Jemi shumë afër ndaj nuk jam pesimist. Sot them që kjo është një reformë drejt miratimit dhe jo dështimit, por PD i bën thirrje mazhorancës që së bashku të ulemi e të gjejmë zgjidhjen përfundimtare për çështjen që e mban peng, çështje e rakorduar dje. Kjo sepse shqiptarët meritojnë një zgjidhje konsensuale të reformës në drejtësi”, tha ai.
I pyetur në lidhje me kritika brenda mbledhjes së grupit parlamentar, pavarësisht qëndrimit unanim që përmendi Basha më sipër, të cilët kanë kritikuar ndoshta edhe për dëmtim të marrëdhënieve të PD-së me ndërkombëtarët, duke e cilësuar PD-në edhe si antiperëndimore, kreu i opozitës u shpreh se “Informacionet ju vijnë të shtrembëruara”.
“Shqetësimi i PD-së është legjitim për shkak të keqpërdorimit që i është bërë kësaj reforme. Po mundohem të vetëpërmbahen dhe të zbatoj në mënyrë vullnetare moratoriumin në këto orë të rëndësishme e të ftoj mazhorancën për reflektim. Por qëndrimi i PD-së është koherent dhe unanim, s’ka si të jetë ndryshe”.
Por shqetësime ka pasur edhe në lidhje me qëndrimin e Shteteve të Bashkuara të Amerikës, teksa ambasadori Lu është shprehur i zhgënjyer nga qëndrimi jokoherent, sipas tij, i opozitës.
“Qëndrimet tona janë koherente. Ky është një debat që jam i gatshëm ta vazhdoj me partnerin tonë strategjik, por ne dje kemi pranuar propozimin e tyre dhe presim që marrëveshja të shkojë drejt miratimit dhe jo abortimit, për truke apo parime që nuk i mbështesin SHBA-të, BE-ja dhe PD-ja, si parti e themeluar mbi vlerat euroatlantike. Ne mbështesim këto vlera dhe jam i sigurtë se përmes negociatave do t’u japim shqiptarëve përfundimin dhe lajmin e mirë”, përfundoi Basha.
.