Ministri i Arsimit ,Arsim Bajrami këtë të marte ka përuruar objektin e ri shkollor në lagjen Dushkaja, premton fillimin e ndërtimit të Shkollës Fillore në fshatin Kaçanik të Vjetër
Kryetari i Komunës së Kaçanikut Besim Ilazi, priti sot në zyrën e tij ministrin e Arsimit, Shkencës dhe Teknologjisë Arsim Bajrami me bashkëpunëtorë. Kryetari Ilazi falënderoi ministrin e arsimit për mbështetjen e dhënë në Komunën e Kaçanikut, ndërsa shtoi se e kemi obligim që nxënësve dhe arsimtarëve të ju ofrojmë kushte dhe infrastrukturë arsimore për mësim. Nga ana tjetër Ministri i Arsimit, Shkencës dhe Teknologjisë Arsim Bajrami, uroi Kryetarin Ilazi për punën që po bën në Komunën e Kaçanikut, ndërsa tha se së shpejti do të fillojnë punimet në ndërtimin e objektit të ri shkollor në Shkollën Fillore “ Qamil Ilazi” në fshatin Kaçanik i Vjetër. Pas këtij takimi me një solemnitet rasti është përuruar objekti shkollor në lagjen Dushkaja në Kaçanik, projekt i financuar nga Ministria e Arsimit, Shkencës dhe Teknologjisë. Prerjen e shiritit e bënë Kryetari i Komunës së Kaçanikut Besim Ilazi, Ministri i Arsimit, Shkencës dhe Teknologjisë Arsim Bajrami, deputeti i parlamentit të Republikës së Kosovës Elmi Reçica dhe Agim Aliu si dhe drejtori për Arsim dhe Kulturë në Kaçanik Enver Kamishi.
Me këtë rast Kryetari i Komunës së Kaçanikut Besim Ilazi, uroi nxënësit dhe mësimdhënësit për objektin e ri shkollor. “ Sot është një ditë e veçantë për të gjithë nxënësit dhe mësimdhënësit e shkollës “ Emin Duraku”, janë dy gëzime, fillimi i vitit shkollor si dhe mësimi në objektin e ri shkollor, një objekt modern, që plotëson kushtet dhe nevojat për mësim” tha mes tjerash Kryetari Ilazi. Ndërkohë Ministri i Arsimit Shkencës dhe Teknologjisë Arsim Bajrami, u shpreh i lumtur që është në qytetin historik në Kaçanik, ndërsa uroi nxënësit, mësimdhënësit dhe Komunën e Kaçanikut për objektin e ri shkollor. “Vitin e ri shkollor po e nisim në këtë objekt modern që ofron kushte te jashtëzakonshme për punë, është obligim i yni, që nxënësve të ju ofrojmë kushte për mësimdhënie cilësore” tha ministri Bajrami, ndërsa edhe në këtë solemnitet përsëriti premtimin e ministrisë së arsimit për ndërtimin e objektit të ri shkollor në Kaçanik të Vjetër. Mysafirët në këtë solemnitet i përshëndeti edhe Avdyl Reka- Drejtori i Shkollës Fillore “ Emin Duraku”, i cili falënderoi MASHT-in dhe Komunën e Kaçanikut, ndërsa foli edhe për sukseset e kësaj shkolle në cilësinë e arsimit. Më pas ministri i arsimit me bashkëpunëtorë dhe Kryetari i Komunës me stafin ekzekutiv, vizituan Shkollën Fillore “ Qamil Ilazi” në Kaçanik të Vjetër, për tu njohur nga afër me kushtet e kësaj shkolle, dhe njëherit Ministri Bajrami u premtoi nxënësve që vitin e ardhshëm shkollor do ta presin në objektin e ri shkollor.