Komisioneri i Bashkimit Evropian për Negociatat e Zgjerimit dhe Fqinjësinë, Johanes Hahn, shprehet se qeveria turke kishte përgatitur më herët arrestimet masive të gjyqtarëve. Hahn tha sot nga Brukseli se qeveria e Ankarasë kishte përgatitur listën përpara se të zhvillohej grushti i shtetit. Ai tha se arrestimi i shpejtë i gjyqtarëve e tregon këtë.
“Jam shumë i shqetësuar. Kjo është pikërisht ajo që ne kishim frikë”, tha komisioneri i BE-së.
Mbrëmjen e 15 korrikut në Turqi u organizua një grusht shteti, i cili rezultoi i dështuar. Mbi 2 mijë gjykatës janë arrestuar nga policia, ndërsa numri i të arrestuarve shkon në mbi 6 mijë.