Gjatë ditës së sotme, Kryetari i Komunës së Ferizajt, Agim Aliu ka pritur në takim Ambasadorin e Republikës së Shqipërisë në Kosovë, Shkëlqesinë e Tij, z. Qemal Minxhozi.
Në këtë takim është diskutuar bashkëpunimi në mes qyteteve të binjakëzuara, përkatësisht Komunës së Ferizajt dhe Bashkisë së Shkodrës, ndërveprimi ekonomik e tregtar si dhe rritja e intensitetit të bashkëveprimit në aktivitetet kulturore mes Ferizajt dhe qyteteve të Republikës së Shqipërisë.
Kryetari Aliu me këtë rast falënderoi ambasadorin Minxhozi për vizitën në Komunën e Ferizajt dhe ofrimin e bashkëpunimit në shumë fusha, veçanërisht në ato ekonomike dhe kulturore.
Në anën tjetër ambasadori Minxhozi ka uruar kryetarin Aliu për mandatin qeverisës duke shprehur gatishmërinë e plotë të shtetit shqiptar që të avancoj edhe më shumë mbështetjen dhe bashkëpunimin reciprok në mes dy vendeve.