Një aksident trafiku me fatalitet, ka ndodhur pasditen e kësaj të diele, në autostradën ‘’Arbën Xhaferi’’.
Dyshohet se drejtuesi i automjetit ka humbur kontrollin dhe është rrokullisur konkretisht pranë fshatit Babush të Ferizajt, njofton Klan Kosova.
Këtë për klankosova.tv e ka konfirmuar Zëdhënësi i Policisë për rajonin e Prishtinës, Daut Hoxha, ndërsa thotë se një person tjetër po ashtu raportohet se ka pësuar lëndime të rënda trupore.
”Policia po merret me rastin. Rastet e aksidenteve, kryesisht vetë-aksidenteve javën që po e lëmë pas kanë rezultuar me pasoja fatale, prandaj edhe një herë kërkojmë që drejtuesit e automjeteve të kenë vëmendje të shtuar dhe vigjilencë, sepse përveç rrezikimit të vetës po rrezikojnë edhe pjesëmarrësit tjerë në trafik”.
Hoxha deklaron se Policia e Kosovës do të marrë masa rigoroze ndaj të gjithë atyre që rrezikojnë sigurinë e pergjithshme në trafik dhe do të ketë zero tolerancë.