Në vazhdën e aktiviteteve dhe takimeve me të rinjtë, kryeparlamentari dhe kryetari i Partisë Demokratike të Kosovës, Kadri Veseli sot ka qëndruar në Ferizaj.
Veseli në Ferizaj ka takuar aktivistët e Rinisë Demokratike të cilëve u ka shprehur mirënjohje për punën e tyre.
Gjithashtu, Veseli iu ka premtuar vend dhe rol brenda partisë, e gjithashtu ai u ka siguruar se në udhëheqjen e tij do të kenë hapësirë dhe mundësi në nivel vendi.
“Vetëm një luftë e pakompromis kundër korrupsionit dhe nepotizmit do të bëjë të mundur që të rinjtë tanë të qëndrojnë e ndërtojnë të ardhmen në Kosovë”, ka thënë Veseli.
Në këtë takim me të rinjtë e PDK-së ishte i pranishëm edhe deputeti Elmi Reçica.
“Bashkë me kryetarin e PDK-së, kryeministrin e ardhshëm, z. Kadri Veseli, kryetarin e RDK-së, Donjet Bislimi dhe me kolegë të tjerë nga partia, takuam të rinjtë e degës së Ferizajt të PDK-së, platforma e Dekadës së Re do të fokusohet në ndërtimin e politikave tona kombëtare të orientuara për të rinjtë për të ofruar perspektivën e të rinjve që lidhen me ndërmarrësinë dhe inovacionin, jetësimin e dekadës së lidershipit të rinjve, që të jenë pjesë aktive e vendimarrjes politike, reformave, fitoreve dhe sfidave të reja politike. Me qeverisjen e drejtuar nga PDK-ja, të rinjtë e vendit tonë do të jenë pjesë dhe bartës të fuqizimit dhe zhvillimit të shtetit tonë dhe gjithsesi e angazhimeve institucionale e shtetërore në rrugëtimin e realizimit të plotë të shtetit të shanseve të barabarta, zhvillimit ekonomik, fuqizimit të sovranitetit dhe integrimin e plotë të vendit tonë” ka shkruar Reçica.
