Drejtori i Drejtorisë së Bujqësisë dhe Pylltarisë në Ferizaj, Burim Bajrami paraditen e sotme ka pritur në takim homologen e tij nga Komuna e Kllokotit, znj. Doruntina Rexhepi me ç’rast u diskutua për formën e bashkëpunimit mes dy drejtorive, gjegjësisht mes Komunës së Ferizajt dhe Komunës së Kllokotit në fushën e bujqësisë dhe mbrojtjes së pyjeve.
Drejtori Bajrami ka njoftuar mysafiren me gjendjen në sektorin e bujqësisë në komunën tonë si dhe hapat që ka ndërmarr ekzekutivi, me mbështetjen e fuqishme edhe të Kryetarit të Komunës, Agim Aliu për të vendosur rregull dhe meritokraci në investimet në fushën e bujqësisë. Shqetësuese për të dy komunat u vlerësua dëmtimi i pyjeve, sfidë kjo institucionale si në nivelin lokal ashtu edhe në atë qendror.
Në anën tjetër, Doruntina Rexhepi, drejtoreshë e bujqësisë në Komunën e Kllokotit shprehu falënderimin e saj dhe institucionit që përfaqëson për gatishmërinë e Komunës së Ferizajt, për të ndihmuar në këtë sektor duke siguruar forcimin e raportit të bashkëpunimit mes këtyre dy komunave.
