Kaçanik, 14 Maj 2019 – Në 20 vjetorin e rënies është përkujtuar Heroi i Kosovës, komandanti i Brigadës 162 “Agim Bajrami”, Qamil Ilazi – komandant Bardhi.
Me rastin e 20-vjetorit të rënies së komandantit të Brigadës 162 “Agim Bajrami”, Qamil Ilazi, Komandant Bardhi, është mbajtur akademi përkujtimore për të nderuar veprën e tij.
Me këtë rast u tha se roli i komandant Bardhit ishte shumë i rëndësishëm për çlirimin e Kosovës.
Pjesë e kësaj akademie ishin dhe dy krerët institucional, ku thanë se lufta e UÇK-së ishte luftë e pastër për çlirim, ndërsa përsëriten se dënimi i gjenocidit serb është i domosdoshëm.
Presidenti i Kosovës, Hashim Thaçi, u shpreh se komandant Bardhi është njëri ndër personalitetet më të shquara të UÇK-së, që sipas tij pa të dhe të tjerët realiteti i lirisë së Kosovës nuk do të arrihej.
“Realiteti i lirisë së Kosovës kurrë nuk do të arrihej pa gjakun dhe sakrificat e djemve dhe vajzave të Kosovës. Këtë realitet nuk do të kishim pa Qamilin dhe bashkëluftëtarët të tij”, tha presidenti Thaçi.
Ndërsa, kryetari i Kuvendit, Kadri Veseli tha se Qamil Ilazi për tre dekada i kishte kushtuar veprës së tij për Kosovën.
Duke folur në Akademinë përkujtimore kushtuar 20-vjetorit të rënies heroike të Qamil Ilazit – Komandant Bardhit në Kaçanik, Kryeparlamentari Veseli tha se populli i Kosovës ka bërë luftë të drejtë dhe çlirimtare ndaj okupatorit serb, i cili vrau e masakroi mijëra qytetarë të Kosovës.
Kryeparlamentari Veseli tha se janë disa personalitete të cilat në jetën dhe veprimtarinë e tyre pasqyrojnë gjithë fatin historik të kombit të tyre. Një personalitet i tillë, tha Veseli, ishte Qamil Ilazi, komandant Bardhi.
Ai tha se 30 vjet aktivitet në shërbim të vendin, flasin më se miri për një personalitet që e dinte se cilës kohë i përkiste, e dinte se çfarë kërkonte koha dhe atdheu prej tij.
“Qamil Ilazi, me guxim e vendosmëri, iu përgjigj kohës dhe atdheut, si njeri i lapsit dhe i pushkës. Në historinë e popullit tonë lapsi dhe pushka gjithmonë kanë shkuar bashkë. Qamil Ilazi me veprimtarinë dhe luftën e tij është shëmbëlltyrë e kësaj vlere të popullit tonë”.
“Është shëmbëlltyrë e luftës tonë të drejtë, luftës të pastër, luftës tonë për liri e dinjitet kombëtar. Kjo luftë dhe Ushtria Çlirimtare e Kosovës, duke i sjellë lirinë një populli të robëruar me shekuj, i ka bërë një shërbim të madh njerëzimit: e ka bërë më të drejtën botën”, theksoi Veseli.
Ai shtoi se sot, të gjithë ata që kishim nderin të jenë pjesë e Ushtrisë Çlirimtare të Kosovës, qëndrojnë krenarë dhe ballëhapur para çdo kujt.
Para Akademisë përkujtimore, Kryeparlamentari Veseli vendosi lule dhe bëri homazhe edhe tek shtatorja e Qamil Ilazit në Kaçanik.
“Qamil Ilazi është shembull i vlerës së kombit tonë, luftës së drejt e të pastër të Kosovës. Lufta e UÇK-së është luftë e pastër për çlirim, ndërsa gjenocidi serb është vepër e tyre që njëherë e mirë do të japim përgjegjësi. Gjykata për krimet e tyre është e domosdoshme dhe e pashmangshme”, tha ai.
Nënkryetari i komunës së Kaçanikut, Ylber Bajra, tha se Komandant Bardhi ishte personaliteti i duhur për t’u bërë simbol i luftës në Kaçanik dhe më gjerë, pasi siç tha ai gjithmonë ishte në ballë të betejave.
