Pas vendimit të Qeverisë së Kosovës që pronat e AKP-së të kthehen në menaxhim të Komunave, parcela për varrezat e qytetit në Fshat të Vjetër do të ketë sipërfaqe të përgjithshme prej afro 34 hektarësh
Gjatë ditës së sotme, ekzekutivi komunal mbajti mbledhjen e rregullt javore me ç ‘rast Kryetari i Ferizajt, Agim Aliu u njoftua nga drejtorët e drejtorive komunale për rezultatet e punës në drejtoritë përkatëse. Temë që pati vëmendje të shtuar në këtë mbledhje ishte vendimi i Kryeministrit të Republikës së Kosovës, Ramush Haradinaj pas kërkesës së bërë nga Komuna e Ferizajt, që pronat e menaxhuara deri më tani nga Agjencia Kosovare e Privatizimit të kthehen në pronësi komunale, rrjedhimisht edhe të menaxhohen nga to.
Shto për këtë, përkitazi me vendimin e Kuvendit të Komunës për vendosjen e varrezave të qytetit në Fshatin e Vjetër, Komuna e Ferizajt do të shpall në interes të përgjithshëm edhe parcelat 583-0, 579-15, 579-16, 567-1, 567-2, 567-3, 579-13 ZK Fshat i Vjetër, për varrezat e qytetit në një sipërfaqe prej 135364m2 apo afro 13.5 hektarë, e që edhe me hapësirën e ndarë më parë prej afro 6 hektarë truall duke e përfshirë edhe ngastrën kadastrale 579-18 me sipërfaqe prej 149620m2, varrezat e qytetit do të kenë një sipërfaqe të përgjithshme prej afro 34 hektarësh.
Ky destinim ofron zgjidhje afatgjate për varrezat e qytetit dhe vjen pas vendimit të Qeverisë së Republikës së Kosovës që pronat e menaxhuara nga AKP të kthehen nën menaxhimin e komunave, duke krijuar kështu më shumë mundësi për aplikimin e projekteve të ndryshme që ka Komuna e Ferizajt, investime këto që do të shtrihen në këto prona.
Komuna e Ferizajt me në krye, Kryetarin e Komunës, Agim Aliu është në fazën përfundimtare të hartimin të planit për destinimin e parcelave deri më tani të menaxhuara nga Agjencia Kosovare e Privatizimit, në funksion të përmbushjes së platformës qeverisëse dhe realizimit të projekteve të ndryshme në interesin e qytetarëve.
