Këtë të mërkurë në Galerinë e Artëve në Qendrën e Kulturës në Ferizaj në bashkëpunim me Institutin Goethe, Drejtorinë për Kulturë, Rini dhe Sport, dhe Qendra Multimedia është hapur ekspozita “Past is now” (E kaluara është tash).
Në hapjen e kësaj ekspozite morën pjesë Ambasadorja e Gjermanisë, Angelika Viets, kryetari i komunës së Ferizajt, Muharrem Sfarqa, kuratori i Galerisë Kombëtare të Kosovës, Zeni Ballazhi dhe artdashës të artit dhe kulturës.
Mbase në asnjë pjesë tjetër të Evropës e kaluara e dhimbshme dhe e dhunshme e viteve të nëntëdhjeta të shekullit të kaluar nuk është ndier ashtu si në vendet e ish Jugosllavisë. “E kaluara është tash” fokusohet në kohën që nga rënia e Murit të Berlinit, shpërbërja e deri në ditët tona, u tha me rastin e hapjes së kësaj ekspozite
Ekspozitën e shpalli të hapur kryetari i Ferizajt Muharrem Svarqa i cili zgjedhjen e qytetit të Ferizajt për këtë ekspozitë e ka vlerësuar si nder për kulturën e këtij qyteti.
”Jam këtu për të shpreh falënderimin dhe konsideratën e jashtëzakonshme që në vazhdën e ekspozitës lëvizëse nëpër shtetet e rajonit është përzgjedhur pikërisht Ferizaj që të ekspozohen këto këto fotografi të bukura të cilat tregojnë një histori të dhimbshme një fakt të hidhur të ish Jugosllavisë’ ka thënë Svarqa.
Svarqa tha se edhe komuna dhe artistët ferizajas tashmë kanë një përvojë të mirë falë prezencës dhe pjesëmarrjes së tyre nëpër ekspozita ndërkombëtare
Përmes kësaj ekspozite kemi rastin që të shohim potencën tonë krijuese dhe të shohim cili është këndvështrimi i fotografisë që realizohet në raport më të tjerët që vinë nga shtetet e zhvilluara siç është Gjermania” ka thënë Svarqa.
Svarqa me këtë rast ka falënderuar të gjithë ata që kanë kontribuuar në realizimin e kësaj ekspozite.
Edhe Ambasadorja e Gjermanisë, Angelika Viets e ka cilësuar si një ngjarje me vlerë shfaqjen e kësaj ekspozite në Qytetin e Ferizajt.
“Këto fotografi po shprehin një shpirt evropian.Tema e kësaj ekspozite është shumë e qëlluar sepse e kaluara është ajo e cila në fakt e përcakton të tanishmen, e kjo vlen si për shtetet e Ballkanit ashtu edhe për Gjermaninë dhe shtetet tjera Evropiane. Gjithashtu janë me rëndësi të posaçme edhe projektet artistike, të cilat bëjnë bashkë artistë të ndryshëm, për të parë dhe për t’i ballafaquar këndvështrimet e ndryshme. Ky është edhe një fillim për mirëkuptim të ndërsjellë” ka thënë Ambasadorja e Gjermanisë, Angelika Viets
Me fotografi artistike në ekspozitë janë paraqitur krijues nga hapësirat e ish-Jugosllavisë, por edhe krijues të disa vendeve evropiane.
